നിരൂപകന്റെ കോണകം

കെ ടി ബാബുരാജ്

കോണകം ഒരൊറ്റ വാക്കല്ല. അനേകം ശബ്ദാര്‍ത്ഥങ്ങളുടെ സമുച്ചയമാണ്. കോണക നൂല്‍ ഇഴപിരിക്കുന്നതു പോലെ വേര്‍തിരിക്കാന്‍ പോയാല്‍ അതില്‍ നിന്നും വാക്കുകളും അര്‍ത്ഥങ്ങളും വരിവരിയായി ഇറങ്ങി വരുന്നതു കാണാം. കോണോടു കോണായും, ണകമായും, അകമായും, കം ആയും, അം ആയും നൂലോട് നൂല്‍ അതിഴ പിരിയും.

ഒറ്റവാക്കല്ലെങ്കിലും കോണകം ഒരൊറ്റത്തുണിത്തുണ്ടാണ്. കൊളുത്തോ പിന്നോയില്ലാത്ത കുടുക്കോ ചെയിനോയില്ലാത്ത ഒരു മുഴം തുണി. കുത്തോ കോമല്ലോ ഇല്ലാത്ത വാചകം പോല്‍ അതങ്ങനെ നീണ്ടു കിടക്കും. ജാതി മതം വര്‍ഗ്ഗം രാഷ്ട്രീയം എന്നിവയ്ക്കനുസരിച്ച് നിറം മാറിയെന്നിരിക്കും. ഉച്ചത്തിലുയര്‍ന്നു പാറുന്ന കൊടിയടയാളം പോലെ അതില്‍ ചിലപ്പോള്‍ ചിഹ്നങ്ങള്‍ പ്രത്യക്ഷപ്പെട്ടേക്കാം. ഹിറ്റ്‌ലറുടെ കാലത്ത് അത് സ്വസ്തിക ചിഹ്നമാവാം.ദരിദ്ര നാരായണന്‍മാരുടെ മൂന്നാം ലോകങ്ങളില്‍ അത് മാതൃരാജ്യത്തിന്റെ ഭൂപടമാവാം

വീരവാദം പറയുമെങ്കിലും ഒറ്റൊയ്‌ക്കൊരു നിലനില്‍പ്പില്ല ചങ്ങാതിക്ക്. പിടിച്ചു നില്‍ക്കാന്‍ നിരൂപകന്റെ സഹായം തേടുന്ന കവിയെപ്പോലാണത്. അരനൂലിന്റെ വിലയറിയുന്നത് അപ്പോഴാണ്. മുഷിഞ്ഞ് നിറം മങ്ങിയ വൃത്ത സ്ഥൂലതയുടെ ഇരുവശങ്ങയിലായി കൈകാലുകള്‍ ഞാത്തിയിട്ട് തൂങ്ങിക്കിടക്കണം ചങ്ങാതിക്ക്. മറ്റൊന്നിന്‍ ധര്‍മ്മയോഗത്താല്‍ അതു താനല്ലയോ ഇത് എന്ന മാതിരി. എന്നാലെന്താ കാത്തുരക്ഷിച്ചില്ലേ നാണവും മാനവും ഒരുപാടു കാലം. കാലി ചെക്കന്റേയും നാടുവാഴുന്ന തമ്പുരാന്റെയും.

പലപ്പോഴും ആഢ്യത്വത്തിന്റെ അലങ്കാര ചിഹ്നമായിട്ടുണ്ടത്.അടിമത്തത്തിന്റെ കൊടിക്കൂറയും. പട്ടുകോണകത്തിനും കീറക്കോണകത്തിനുമിടയിലെ തീണ്ടാപ്പാടകലം സാമൂഹ്യ ശാസ്ത്രത്തില്‍ പഠിക്കാനുള്ള വിഷയമായി.പില്‍ക്കാലത്ത് അടിവസ്ത്ര വിപണിയെ സ്വന്തമാക്കിയ കോര്‍പ്പറേറ്റ് ഭീമന്‍മാര്‍ കോണകത്തിന്റെ സോഷ്യല്‍ സ്റ്റാറ്റസ് ബോധ്യപ്പെട്ടവരാണ്. മുതലാളിത്തത്തോടുള്ള അസൂയ കലര്‍ന്ന കുശുമ്പാണ്, മുതലാളിത്തം കഴുത്തില്‍ കെട്ടി തൂക്കിയ ‘ ടൈ ‘യെ കണ്ഠകൗപീനം എന്നു വിളിപ്പേരിട്ട് കളിയാക്കാന്‍ മൂന്നാം ലോകക്കാരിലെ ബുദ്ധിജീവികളെ പ്രേരിപ്പിച്ചത്.

കോണകം വെറും മൂന്നക്ഷരമല്ല.ഭാഷാ പ്രയോഗങ്ങളുടെ തൂങ്ങിയാടുന്ന വാലാണ്. ‘ന്താ കോണകത്തിന് തീപ്പിടിച്ചതു പോലെ ‘ യെന്ന് ആശങ്കപ്പെടുന്നവന് കോണകത്തിന് തീപ്പിടിച്ചോടുന്നവന്റെ ആ പൊള്ളല്‍ മനസിലാവണമെന്നില്ല. അണ്ഡകടാഹം വേവുന്ന പാച്ചിലില്‍ അതൊന്ന് പറിച്ചെറിയാന്‍ പോലുമാവാത്ത മരണഭ്രമം തലക്കുപിടിച്ച ആഅവസ്ഥ ഒരവസ്ഥ തന്നെയാണേ.കൊച്ചീലഴിമുഖം തീപ്പിടിച്ച നേരത്ത് തന്റെ കോണകവാലുകൊണ്ടു തല്ലി തീ കെടുത്തിയ ഒരു വിരുതന്റെ കഥ എന്‍.എന്‍. കക്കാട് എന്ന കവി ഒരസംബന്ധ കവിതയായി പാടിയിട്ടുണ്ട്. ‘കഷ്ടകാലലു കോണലു പാമ്പലു കൊത്തലു ‘എന്ന് ചങ്ങായി തെലുങ്കുവല്‍ക്കരിച്ച ചൊല്ലിന്റെ തനി രൂപം കഷ്ടകാലത്ത് കോണകം പോലും പാമ്പായി കൊത്തും എന്നാണ്. കോണകത്തിന് പ്രത്യേകിച്ചൊരു വാലില്ലെങ്കിലും, ചിലര്‍ക്കു പിന്നാലെ തൂങ്ങി നടക്കുന്നോര്‍ക്ക് കോണകവാലന്‍ എന്നൊരു വിളിപ്പേരു വീണിട്ടുണ്ട്. ഭാര്യമാരുടെ വാലും തൂങ്ങി നടക്കുന്ന കുഞ്ചിരാമന്‍ മാര്‍ക്കും ഈ പേര് ചേരും.

ലിംഗനീതി, ലിംഗസമത്വം എന്നൊക്കെ ഉച്ചസ്തരം ഘോഷിക്കുന്ന കാലമാണിത്.കോണകം ആണഹങ്കാരത്തിന്റെ ധാര്‍ഷ്ട്യങ്ങളുടെ കൊടിക്കൂറയാണെന്നും പുരുഷാധിപത്യമാണ് അതില്‍ വിജൃoഭിച്ചു നില്‍ക്കുന്നതെന്നും ഏതെങ്കിലും അര്‍ബന്‍ ഫെമിനിസ്റ്റുകള്‍ പറഞ്ഞു കൂടായ്കയില്ല.സത്യത്തില്‍ ഇതാണുങ്ങളുടെ കുത്തകയല്ലെന്നും, കോണകവാലന്‍ എന്ന പുലിംഗം പോലെ കോണകവാലി എന്ന സ്ത്രീലിംഗവും ഭാഷാ നിഘണ്ടുവില്‍ വേണമെന്ന് സ്ത്രീവാദികള്‍ ശബ്ദമുയര്‍ത്തിക്കൂടായ്കയില്ല.’കോണകവും ഭിന്ന ലൈംഗികതയും’ എന്ന വിഷയത്തില്‍ ഗവേഷണം അനുവദിക്കണമെന്ന് യൂനിവേര്‍സിറ്റികളിലെ ഗവേഷണ വഴികാട്ടികളോട് ഏതെങ്കിലും വിദ്യാര്‍ത്ഥി /… നി അപേക്ഷിച്ചു കൂടായ്കയുമില്ല.

നിരന്തരം അലക്കി ഉപയോഗിച്ചിട്ടാണോ എന്നറിയില്ല കോണകം ചുരുങ്ങി കോണമാവാറുണ്ട്. വാക്കുകളെ ചുരുക്കുന്നത് സ്വതവേ വടക്കന്‍മാരുടെ ഒരു ശീലമാണ്. അവര്‍ സുലോചനയെ സു ആക്കിക്കളയും. അധികം കളിച്ചാല്‍ നിന്നെ കോണം കെട്ടിക്കളയും എന്നൊരു ഭീഷണി പ്രയോഗം വടക്കര്‍ക്കിടയിലുണ്ട്. എതിരാളിയെ നിഷ്പ്രഭമാക്കുന്ന ഒരു പൂഴിക്കടകനാണത്. ഒരടിവസ്ത്രം പോലെ ചുരുട്ടിക്കെട്ടാവുന്ന ബല ശൂന്യനായ ഒരുവനാണ് നീയെന്ന ധ്വനി അതില്‍ മുഴച്ചു നില്‍ക്കുന്നു. ധ്വനിയാണല്ലോ സാഹിത്യത്തിന്റെ സൗന്ദര്യം.

സത്യത്തില്‍ കോണകത്തിന് കോണില്ല. അതൊരു ദീര്‍ഘചതുരമാണ്. നീട്ടി വിരിച്ച് ഇസ്തിരിയിട്ടാല്‍ വേണമെങ്കില്‍ കോണ്‍ കണ്ടെത്താമെന്നു മാത്രം. അകവും അങ്ങനെ തന്നെ. ‘അകം പുറം മറിച്ചെങ്ങനെ വേണേലുമുപയോഗിക്കാം കോണകം ‘ എന്നൊരു വൃത്ത ലക്ഷണം വൈയാകരണന്‍ മാര്‍ക്ക് പുതുതായുണ്ടാക്കാം. കോണകത്തിലെ ‘കം’ ല്‍ ഒരു കവിതയുണ്ട്. വാഴക്കൊലപാതകത്തില്‍ അയ്യപ്പപ്പണിക്കര്‍ കണ്ടെത്തിയതുപോലെ കോണകത്തിലും നവകവികള്‍ക്ക് കവിതകണ്ടെത്താം. കോണകം, ണകം, കം, അം.

‘അം’ എന്നാല്‍ തിന്നുന്നത് എന്ന് പ്രൊഫസര്‍.എം. എന്‍. വിജയന്‍ മാഷ് പറഞ്ഞിട്ടുണ്ട്. തിന്നുന്നത് എന്താണോ അതാണ് അമ്മ എന്നും അദ്ദേഹം കൂട്ടി ചേര്‍ക്കുന്നു. ജനിക്കും തൊട്ടെ നമ്മള്‍ അമ്മയെ തിന്നുന്നവരാണ് എന്ന് സ്ഥാപിക്കാനാണ് അദ്ദേഹത്തിന്റെ ശ്രമം.കോണകത്തിലെ അം എന്തായിരിക്കും എന്നാണ് നമ്മുടെ ചിന്ത. ഗതിമുട്ടിയാല്‍ കോണകവും തിന്നാം എന്നൊരു സൂചന അതില്‍ പുലിയെപ്പോലെ പതുങ്ങിയിരിക്കുന്നുണ്ടോ… ചാര്‍ലി ചാപ്ലിന്റെ ഒരു സിനിമയില്‍ വിശപ്പിന്റെ ഗതികേടുകൊണ്ട് കഥാനായകന്‍ തന്റെ ഷൂസ് തിന്നുന്നുണ്ട്. ‘ഗതികെട്ടവന് കോണകവും തിന്നാം’എന്നൊരു ചൊല്ല് ഓര്‍മ്മിപ്പിക്കുന്നുണ്ടോ കോണകത്തിലെ ‘അം’

ലോകമെമ്പാടും മുഖംമൂടി മനുഷ്യര്‍ നിരന്നു കഴിഞ്ഞു.നേരത്തെ തന്നെ നേരാംവണ്ണം തിരിച്ചറിയാന്‍ കഴിയാത്തവര്‍ കൂടുതല്‍ പ്രച്ഛന്നവേഷക്കാരായി. കോവിഡ് 19കാരന്‍ ഈ ലോകത്തിന്റെ കോണകത്തിനാണ് തീ കൊളുത്തിയിരിക്കുന്നത്. അണ്ഡകടാഹത്തിനു തീ പടരുമ്പോള്‍ അതില്‍ നിന്നും രക്ഷ നേടാന്‍ മുഖകൗപീനം അല്ലെങ്കില്‍ മുഖകോണകം (Mask) മാത്രം തുണ.മുഖ കോണകം ധരിച്ചിച്ചില്ലെങ്കില്‍ പിഴയടക്കണമെന്ന നിയമം നിലവില്‍ വന്നിരിക്കുന്നു. നവലോകകോര്‍പ്പറേറ്റുകള്‍ക്ക് ഒരു പുത്തന്‍ വ്യവസായം കൂടി തുറന്നു കിട്ടിയിരിക്കുന്നു.

ഇങ്ങനെ കോണകത്തില്‍ പിടിച്ചു കയറുന്നത് ഒരു കോണോത്തിലെ ഏര്‍പ്പാടാണെന്ന് നിങ്ങള്‍ക്കു തോന്നാം. നിരൂപകന്റെ രാജ്യഭാരം നിങ്ങള്‍ക്കറിയാഞ്ഞിട്ടാണ്. അന്യദേശ തൊഴിലാളികള്‍ പോയി അതിഥി തൊഴിലാളികളായതുപോലെ നിരൂപകന്‍ പോയി സാസ്‌ക്കാരിക വിമര്‍ശകനായ കാലമാണ്. ഏതെങ്കിലും കോണോത്തും വാലില്‍ പിടിച്ചു കയറിയാലെ മുന്നോട്ടു പോവാനാവൂ.കോണകം കഴിഞ്ഞിട്ടു വേണം ലംങ്കോട്ടിയില്‍ പിടുത്തമിടാന്‍…