നോക്കൂ… ഇത് സീരിയസായ ഒന്നാണ്
കാർത്തിക് കെ.
നോക്കൂ
എന്റെ തലയിലേക്ക് നോക്കൂ
അവിടെ പരന്ന് കിടക്കുന്നത് നോക്കൂ
നിങ്ങളത് ഊതിപ്പറപ്പിക്കാൻ പാടില്ല
കാരണം അതെന്റെ മുടിയല്ല.
നോക്കൂ
ശ്രദ്ധിച്ച് നോക്കൂ
വെളിച്ചം മറക്കാതെ നോക്കൂ
അത് ഒന്നിന്റെയും നിഴലല്ല
കാരണം ഞാനൊരു മൊട്ടത്തലയനല്ല.
നോക്കൂ
ഒരളവ് ഭക്തിയോടെ നോക്കൂ
ഇത് സീരിയസായ ഒന്നാണ്
എന്റെ തലയിൽ പ്രണയം വെയിലു കൊള്ളുകയാണ്
തെളിച്ചു പറഞ്ഞാൽ
തലയിൽ പാർക്കുന്ന എന്റെ കാമുകി
അവളുടെ തുണികൾ
തിരുമ്പിയുണക്കാനിട്ടിരിക്കുകയാണ് അവിടെ.
