ശോശാമ്മ
ആദിത്ത് കൃഷ്ണ ചെമ്പത്ത്
ഘടികാരങ്ങള്‍ക്ക്,
ശോശാമ്മയുടെ
കണ്ണിന്റെ
താളമറിയുന്നതു കൊ
ണ്ടാവാം,
ശോശാമ്മയുടെ
സ്വപ്നത്തിലിരുന്ന വ
പതുക്കെ
അപ്പൂപ്പന്‍,
ചുമച്ചുമക്കുന്നത്….
കുശിനിയുടെ
പുക കുഴലില്‍
വെപ്രാളപെട്ടോടുന്ന
പെരുച്ചാഴികള്‍
ക്കറിയാം,
ചിലച്ചാല്‍
ശോശാമ്മ തങ്ങളെ
കണക്കറ്റു പ്രാകുമെന്ന്,
അതുകൊണ്ടാണവ
മയത്തില്‍
കുശിനിയുടെ
ഉത്തരത്തില്‍
ഉറക്കം നടിച്ചു
കിടക്കുന്നത്…
വ്രാന്തയില്‍
രാത്രി മഞ്ഞിന്റെ
തണുപ്പില്‍,
വിറങ്ങലിച്ചു
നില്‍ക്കുന്ന
അമ്മി കല്ലിനറിയാം
ശോശാമ്മയുടെ
ഇളം കാലിന്റെ
വലുപ്പം
അതുകൊണ്ടാണവ
ഇളകാതെ
അടങ്ങി കിടക്കുന്നത്..
പുക കുഴലിനുമറിയാം
ശോശാമ്മയുടെ
കുറുനെഞ്ചിന്റെ
താളം,
അതുകൊണ്ടാണവ
ശ്വാസമടക്കി നിക്കുന്നത്..
കുശിനിയിലെ
വെളുത്ത
വെള്ളി കിണ്ണങ്ങള്‍ക്കും
ചില്ലു കുപ്പികള്‍ക്കും മറിയാ0
ശോശാമ്മ പെണ്ണിന്റെ
തിളങ്ങുന്ന
കനവ്..
അതുകൊണ്ടാണവ
നിലത്തു
പൊട്ടാതെ നിക്കുന്നത്..
രാത്രിയില്‍
എണീക്കുന്ന
തെക്കെ വീട്ടിലെ
പെണ്ണുങ്ങള്‍
കേള്‍ക്കാറുണ്ട്,
കുശിനി
ജനാലകളില്‍
വന്ന് തട്ടുന്ന
ഇളം കരച്ചില്‍,
പൊലര്‍ച്ചയ്ക്ക് വേവിക്കാന്‍
രാത്രിയറക്കുന്ന
പെണ്ണാടുകളുടെ
കൊഴുത്ത ചോരയുടെ
ഗന്ധം…
ഇരുവശത്തു നിന്നും
പാളത്തില്‍
മുളച്ച ചെമ്പരത്തി പൂക്കളെ
ചവുട്ടിയ രച്ചു കൊണ്ട്
പെണ്‍ ചോര നിറച്ചു വരുന്ന
ആണ്‍ തീവണ്ടികളെ പറ്റി
പറയുന്നു.
പാളത്തില്‍ ചാകുന്ന
ചെമ്പരത്തി പൂക്കള്‍
ഏറെ
ഇഷ്ടമുള്ള പെണ്‍കുട്ടികള്‍
നാട്ടിലെ
ആമ്പല്‍ കുളങ്ങളില്‍
കാണാ ചുഴികളെ
പറ്റി പറയുന്നു
വെള്ളത്തില്‍
മുങ്ങി ചത്തവര്‍.
സാത്താന്‍
മാര്‍ പതിയിരിക്കുന്ന
ഇടവഴിയിലെ
പൊട്ടകിണറ്,
പെണ്‍ കുരുവികളുടെ
തലയറുക്കുന്ന
വേട്ടക്കാരന്റെ
കൂരമ്പ്,
മാളങ്ങളില്‍
പെണ്‍ തവളകളുടെ
കഴുത്തില്‍
പിടിച്ച് കുടയുന്ന
വിഷ പാമ്പുകള്‍
പെണ്‍കുട്ടികളെ
മത്ത് പിടിപ്പിക്കുന്ന
തീണ്ടാരി സന്ധ്യകള്‍,
കന്യാചര്‍മങ്ങള്‍
വാറ്റിയെടുക്കുന്ന
നാട്ടിലെ കള്ളിന്‍ ഷാപ്പുകള്‍
ശോശാമ്മയുടെ
കൈക്കല തുണികളില്‍
അവരുടെ മൂക്കൊലിപ്പിന്റെ
പാട്,
തേന്‍ ഭരണികളില്‍
അവരുടെ
കണ്ണിലെ
ഒരു കുടം
ചുടുചോര…
വെയിലു പതിയേ
വീഴുന്നതും
നോക്കി
ശോശാമ്മ ഇരിക്കുന്നു.
പകലിലും
കാട്ടു ഗുഹകളുടെ
ഇരുട്ടുള്ള
കുശിനിയില്‍
തേന്‍ കുടിച്ചു
മദിച്ചു വന്ന
ഒരാണ്‍ വണ്ട്
ചുമര്‍ വിടവിലൂടെ
ഇറങ്ങി വന്നു.
തെക്കെ വീട്ടിലെ
കുട്ടികളുടെ
പേറ്റുവെള്ളം
ചുമന്ന
പാത്രങ്ങളില്‍
അത്
പോയി
ചിറകൊതുക്കി.
എന്നിട്ട്
ശോശാമ്മയുടെ
മുഖത്തേക്ക്
ദഹിക്കുന്ന
നോട്ടമെറിഞ്ഞു.
ആണ്‍ വണ്ടുകള്‍
നിറയെ പാറണ
പുറത്ത്,
ഉദിച്ച പകലു കാണാതെ
കുശിനി യടുപ്പില്‍
തെക്കെ വീട്ടിലെ
ശോശാമ്മ പെണ്ണ്
പച്ചയ്ക്ക് വെന്തു.
